Таразда Д. И. Менделеев атындағы Ресей химия-технологиялық университетінің (РХТУ) өңірлік филиалында қамқоршылық кеңестің алғашқы отырысы өтті. Іс-шара филиалдың оқу базасында өтіп, оқыту орталығының дамуына серпін берді. Кеңес - филиал жұмысының тиімділігін арттыру, өңірлік кәсіпорындармен стратегиялық серіктестікті нығайту, инженерлік-техникалық кадрлар даярлау және сапасыз көтеру мақсатында құрылған.
Мекеме филиалы Қазақстанға шетелдік белді университеттерді тартуға жарқын мысал болды. Еске салсақ, 2024 жылы мемлекет басшысы Қ.К.Тоқаев елімізде шетелдік беделді оқу орындарының филиалын ашу туралы үкіметке тапсырма берген болатын. Президент бастамасын іске асыру бойынша алғашқылардың бірі болып Тараз өңірлік университетінің базасынан Д.Менделеев атындағы РХТУ филиалы ашылды.
Филиал ашуға «Казфосфат» ЖШС инвестор ретінде өз септігін тигізді. Компания халықаралық стандарттарға сай материалдық-техникалық базасын түгендеп, химия-инженерлік бағыт бойынша заманауи зертханалармен жабдықтады. Сондай-ақ «Казфосфат» қаржыландыруды тұрақты түрде жүргізіп, бітіруші түлектер жұмыс орнын ұсынады.
Кеңеске ҚР мемлекеттік органдары, жетекші өнеркәсіптік кәсіпорындар, өңірдің жоғары оқу орындарының басшылары қатысты. Атап айтсақ, «Қазфосфат» ЖШС бас директоры Евгений Пак, «ЕвроХим-Каратау» ЖШС бас директоры Игорь Георгиади, ҚР Парламенті мәжілісінің депутаты Мұқаш Ескендіров, «Уралхим» АҚ бас директорының орынбасары Инесса Коген, Д.И. Менделеева атындағы РХТУ ректоры Сергей Филатов, Тараз өңірлік университетінің ректоры Мұқтар Байжұманов,Жамбыл облыстық кәсіпкерлік және индустриялды инновациялық дамыту басқармасының басшысы Аспандияр Сейсенбаев секілді басқа да лауазымды тұлғалар қатысты.
Сондай-ақ қамқоршылық кеңеске ҚР Ғылым және жоғары білім министрі Саясат Нұрбек қатысты. Министр қамқоршылық кеңестің маңыздылығын ерекше атап өтіп, құттықтау лебізін білдірді.
Қамқоршылық кеңестің алғашқы отырысында кеңес төрағасы тағайындалды. Кеңес мүшелерінің шешімімен төрағалық қызметке Мұқаш Ескендіров сайланды. Сондай-ақ төрағалық қызметтің екі орынбасары тағайындалды. Орынбасарлық қызметті «Казфосфат» ЖШС персоналдармен жұмыс істеу жөніндегі директоры Қайрат Болатов және РХТУ ректоры Сергей Филатов атқарады. Кеңес арнайы регламентті бекітіп, жұмыс жүргізудің маңызды бағыттарын айқындады: материалдық-техникалық база модернизациясы, цифрлық және заманауи білім беру технологияларын енгізу, жаңа даярлау бағдарламаларын әзірлеуге қатысу, өнеркәсіптік және ғылыми ұйымдармен ынтымақтастықты орнату, шетелдік жоғары оқу орындарымен әріптестікті дамытып, мамандарды шақыру, сондай-ақ студенттерді әлеуметтік тұрғыда қолдап, жұмысқа тартуға жәрдемдесу.
Сондай-ақ қамқоршылық кеңесте оқу орнының алғашқы жылда атқарған жұмыстары сараланды. Оның ішінде Тараздың 58 мектебінде ашылған «Менделеев сыныптарын» іске қосу жұмысы айтылды. Айта кетейік, филиал студенттерінің 70% - осы сынып түлектері.Сондай-ақ кеңесте кемі 20 индустриялық серіктестік құру, 7 жаңа білім беру бағдарламасын әзірлеу, колледж түлектері үшін жеделдетілген бағдарламалар әзірлеу, 5 жаңа зертхана ашу, аталған жобаларға кемі 1000 оқушы мен колледж студенттерін тарту, екі немесе одан да көп диплом алатын халықаралық бағдарламаларды дамыту, сондай-ақ тіл және мәдениет жобалары бекітілді. Бұдан өзге қабылдау науқанының қағидаты анықталып, 2026-2027 жылдарға арналған 50 грантты бөлу ісі қаралды.
2026 жылдың наурыз айында Тараз қаласындағы РХТУ филиалы қамқоршылық кеңесінің кезекті отырысы өтеді.
Д.И. Менделеев атындағы Ресей химия-технологиялық университеті (РХТУ) – бұл 1920 жылы Ресейдің Мәскеу қаласында құрылған іргелі техникалық жоғары оқу орындарының бірі. 2024 жылы «Қазфосфат» ЖШС қолдауымен Тараз қаласындағы РХТУ өңірлік филиалы ашылды. Филиал өңірдің химия өнеркәсібі үшін қажет сала мамандарын даярлайды. Оқу орны саладағы үздік кәсіпорындармен серіктестік орнатып, оқыту- тәжірибелік бағытты дамытуды көздейді. Мұнда «Бейорганикалық заттардың химиялық технологиясы» бағыты бойынша «Double Degree» бағдарламасы іске асуда. Сондай-ақ «Қазфосфат» ЖШС өндірістік алаңдарында академиялық дәрістерді тәжірибемен байланыстыру моделі жүзеге асқан.