ҚР Экология және табиғи ресурстар вице-министрі Жомарт Шорайұлы Әлиев Жамбыл облысына жұмыс сапарымен келді. Сапар барысында ол Казфосфат ЖШС-нің «Минералды тыңайтқыштар» зауытында болып, кәсіпорынның жұмысымен танысты.
Вице-министрді зауыт басшылығы мен мамандары, сондай-ақ компанияның бас директоры Пак Евгений Геннадьевич қарсы алды. Кездесу барысында қонақтарға зауыттағы өндіріс процесі, жаңа технологиялар мен экологиялық бағыттағы жұмыстар таныстырылды.
Алдымен кәсіпорынның бас инженері Е.Г. Жуков зауыттың жұмыс жүйесі туралы айтып, минералды тыңайтқыштардың қалай өндірілетінін көрсетті. Одан кейін делегация негізгі цехтарды аралап, өндірістің түрлі кезеңдерімен танысты. Вице-министр автоматтандырылған басқару жүйесін, өнімді кептіру және түйіршіктеу процесін, сондай-ақ дайын өнім сақталатын қойманы көрді.
Сапар барысында зауытта қолданылып жатқан заманауи технологиялардың өндіріс сапасын арттыруға және жұмыстың тиімділігін күшейтуге мүмкіндік беріп отырғаны айтылды. Сонымен қатар, экологиялық қауіпсіздікке ерекше көңіл бөлініп жатқаны атап өтілді.
Пак Евгений Геннадьевич вице-министрге кәсіпорындағы жаңғырту жұмыстары, өндірістік қуат және экология бағытында іске асырылып жатқан жобалар туралы кеңінен ақпарат берді.
Кездесу аясында вице-министр зауыт жұмысшыларымен пікір алмасып, олардың сұрақтарына жауап берді. Әңгіме барысында еңбек қауіпсіздігі, қоршаған ортаны қорғау және өндірісті дамыту мәселелері сөз болды. Тараптар өндіріс пен экология арасындағы тепе-теңдікті сақтау маңызды екенін атап өтті.